琴晚去咗呢個「宇宙嘅盡頭」屯門嘅龍鼓灘打算去睇星星，結果一粒星都冇。

但其實，去之前，都已經有少少預咗，因為下午天氣都有少少陰暗，但係我一直做人嘅宗旨…「話咗要做，無論成功機率有幾低，都一定要去做，做咗唔得就冇嘢好講，但係唔做就一定會唔得：亦知道自己會後悔自己冇去試、冇去做。」

去到，雖然睇唔到星星，但係同朋友一齊去咗一個完全陌生嘅地方，坐喺沙灘度飲住杯橙汁吹下水、講下退休生活（我從來都唔點飲酒、同朋友落酒吧通常飲果汁、Fruit punch ），都算係一個非常難忘、開心、全新嘅體驗。

如果唔係呢個30日挑戰，我真係唔會去咗咁多新嘅地方、試左咁多新嘅嘢。

如果你仲未開始，快啲趁依家星期日得閑啲寫低自己想做嘅100件事啦，之後一件一件事咁去完成！

Live with Passion!