你肯定你人生唔會後悔？

今朝同屋企人十點正就已經去到柴灣，準備影返我一直以來都冇影過嘅畢業相。

由拔萃小學、拔萃男書院、英國Wariwck、香港大學，一直以來一張畢業相都冇影過，每一次唔係因為去咗旅行，就係因為timing唔啱，而我本身亦都覺得影畢業相其實冇乜紀念價值。

但因為呢個挑戰，令到我諗返人生入面有啲咩係我想做、或者需要做，但係冇做到嘅事，而迫自己去行動、去做返。

如果唔係呢個30日嘅挑戰，我相信永遠都唔會去影，而見到我阿爸阿媽咁開心咁去影呢輯相，雖然我覺得影唔影都冇乜無謂，但係其實屋企人都幾想影，亦相信今日影呢一輯相、呢一個回憶，令我一家人永遠都會記得，永遠都會有呢一輯影得靚嘅家庭相。

話唔定如果冇做到，我去到死前一刻亦會諗返點解當時唔影呢，甚至後悔同屋企人竟然連一張正常嘅畢業相都無。但問心，會唔會真係後悔？我唔知，可能啦，我亦都唔肯定，但我做咗就一定唔會後悔，唔做就可能會後悔，咁點解唔做呢？