仲記得上一次冇目的、好悠閑咁攤喺度睇星星係幾時嗎？可能係上年？可能已經係好幾年前？甚至已經係講緊細個嘅事？

其實好多時日復日、忙碌嘅工作都會令我哋無意識地，變得非常機械式咁生存，每日努力工作就係為咗層500尺嘅樓？唔同依啲就係我地想要嘅生活？

其實不妨嘗試每一日都做少少野…令到自己開心，好好享受生活。好多時候做呢啲事情都唔需要啲咩錢、只需要我哋用行動，踏出我哋嘅「舒適區」。

琴晚，九點幾先放工，去搵個朋友睇嗰套鬼片「Conjuring2」。睇完已經11點幾，佢同我講咁耐無見，不如去酒吧飲杯野，我就帶咗佢去7-11，拎咗兩樽橙汁就揸車入去科學園，坐咗喺路邊望住個海傾計。途經好黑嘅地方仲同佢講話：「嗰邊好似有個着住白色衫嘅女仔望住你。」之後我就畀人打。

嗰度環境好好，有海風吹著，望住個海，望住天上數之不盡嘅星星咁樣傾計（香港極少見到咁多星星），其實真係幾舒服。
但係anyway , 好多時候我地有好多想做嘅事，都因為一啲無謂嘅藉口而拖延，但諗深一層，其實有好多野即刻做都得。

如果你仲諗住拖延唔去做想做的事情，等到退休先做？
你肯定你仲有精神？
仲有體力？
仲有一班朋友陪你癲？
如果你等，好可能已經太遲。