每日寫日記，你會學到的五件事。
（寫日記，點樣改變左我人生？）

一直以來我都希望令到自己進步，係各個範疇上都做到更好。上年年底嘅時候，我開始聽 Tony Robbins「Personal Power II」嘅Program，佢講到寫日記有3個優點：

1. 記錄每日學咗嘅嘢
2. 記錄每一年嘅成長
3. 令寫作/表達能力有所進步

就係咁嘅原因，我開始咗每日寫日記嘅習慣。到今日為止已經寫咗207篇，覺得學到嘅野，遠超以上3點，其中最重要嘅5點如下：

1. 提高抗壓能力 Stress Resistance
相信大家都會試過好多時候要同時間解決5-10個問題，有時都會覺得好大壓力，有種俾啲煩惱overwhelmed 嘅感覺。而我嘅解決方法就係將啲問題一一寫低後，我會慢慢去分析每一個問題嘅急切性，跟住再排次序逐一解決，啲問題會比較容易迎刄而解。而個腦亦唔會成日俾好多負面情緒充斥，搞到自己好灰。

2. 了解自己嘅價值觀、情緒、目標 Value
好多時候其實如果唔叫你寫低，相信你對自己價值觀、情緒、目標呢啲虛無縹緲嘅概念都會比較模糊。當然，你會有個具體概念大約知道自己嘅價值觀係咩，但唔會好實在。好可能叫你一時三刻仔細地描述出嚟，都會有啲困難。

但係當你每日有寫日記嘅習慣，你可以白紙黑字寫低自己嘅想法，將比較抽象嘅概念具體化，令自己更清晰了解自己嘅情緒，價值觀和目標等等。

3. 思路更加清晰 Insightful
寫作嘅時候，好多人都話需要先寫個大綱諗好成個結構、內容，先開始寫。寫日記當然唔使咁認真啦，但係當你哋每一日都咁樣去練寫日記嘅時候，其實會慢慢鍛鍊你諗嘢嘅思路。

久而久之， 你會好自然係做任何一件事、寫任何一篇文嘅時候，個腦已經好自然出咗全盤計劃、好似有一個大mindmap咁、分析每件事情嘅優點、缺點，優缺點分別發生嘅機率等等，咁樣可以減低做錯誤決定嘅機會。

寫下寫下發覺呢篇文太長啦，其餘個2點下篇再繼續講啦。