Day 29 + 30 | 我人生必需做的 100件事
— 養6隻寵物小精靈到100 LV 【完結篇 + Bonus】

好似之前果篇講過，係 Gameboy 玩Pokemon要養 6 隻精靈到 100 Level 係我人生必做100件事之一。

係我做呢件事之前突然之間Pokemon Go就正式係香港面世，當時我問我自己，為咗夢想去到幾盡？

係咪應該依家退休去捉精靈呢？

諗咗一諗，開左個E-banking黎睇…

，都係退唔到休住。

之後就同一班90後既同事開會，話係時候喇：「我哋正式去搞全球首個，第一屆Pokemon Go大賽」。

有一個同事大笑起來，笑到收唔到制。。。

我冇出聲望住佢。

跟住佢靜左，全場都靜左。

我眼裏面帶着夢想、堅定嘅眼神，令到佢哋知道我係認真，就係咁樣，我哋就正式籌備左第一屆 Pokemon Go 大賽！

雖然未有搞 Event 嘅經驗，但係懷著寵物小精靈：「日夜鍛練」嘅精神，覺得試一吓又有咩所謂。

即刻調咗班玩Pokemon Go，玩到痴晒線、24小時待機嘅同事去做個比賽 Facebook專頁、拍片、整網頁、整紀念品，全部野幾經辛苦，通左一兩晚頂，終於全部做晒 ⋯⋯

就係果一剎那，我先知道原來我同事們嘅潛力竟然係咁深不可測。

正式推出左比賽之後唔夠幾個鐘，竟然有超過千幾人註冊報名，到截止報名嘅時間（72小時內），合共有超過2800人報咗名，我先真正發覺：原來玩寵物小精靈，唔止係我自己嘅夢想，亦係呢幾千人嘅夢想，真係太感動喇！亦好開心贊助商提供左兩個場地， @grandplazahk 同埋 ＠hk.fashionwalk ，都對成個活動好有幫助。

8月6號比賽日完咗喇，亦辛苦晒一眾同事。

雖然今次活動仍有好多不足之處，但係最緊要係已經盡左全力，試咗一次，下一次亦會更努力，Try and fail, but never fail to try。咁樣搞咗一個自己小時候好鍾意嘅Pokemon活動，相信之後睇返，已經問心無愧！亦會好慶幸自己同一班同事為咗 Pokemon 瘋癲過。

之前睇過 Stephen King 本書佢講過：

“You can, you should, and if you’ re brave enough to start, you will."

而你呢？

又有啲咩係想做但係未做呢？

(挑戰 29 — 完左細個 Pokemon 既夢，挑戰 30 — 搞左個過1000人既活動，去到呢到，30個挑戰就正式完成，What’s next？)

#多謝Fashionwalk #多謝GrandPlaza #辛苦晒同事