你願意為一個女仔去到幾盡？(第二回)

六月 2, 2016 by Felix Wong 王嘉裕無迴響

你願意為一個女仔去到幾盡？(第二回)

一個90後創業家的愛情故事
你願意為一個女仔去到幾盡？

上回：我同岩岩識嘅Eriko準備去星加坡，點知佢last minute先同我講唔去。
但轉個頭佢自己買左機票出發。

到底我應唔應該追過去？

－－－－－－－－－－－－－－－－－

5月28日

最後我即刻book左機票，坐兩點鐘機過去。

點解我會咁做？因為我不嬲都慣左做決定嘅時侯，腦海會出左個mind map ，分析哂所有後果。

去：因為我一直相信，如果我去咗，盡晒力去搵Eriko，都留唔住佢嘅話，
我會輸得心服口服，佢5月31號飛走嘅時候，我亦無話可說。

唔去: 就會係我親手放棄呢一段感情，亦等於叫Eriko唔使揀啦，我王嘉裕自動棄權。

棄權呢兩個字，永遠唔會係我個字典出現。

所以我即刻Book左機票過去搵Eriko，亦無話俾佢知我會過去搵佢，扮晒係香港同朋友出左街玩。

係WhatsApp嗰度，試探咗Eriko幾次，問佢住邊間酒店，
Eriko: 「唔話你知，你知黎做咩喎? 」
佢死都唔肯講，
但係安心在一點：最少佢買咗張上網卡，就算係星加坡，我地都可以WhatsApp。

成件事超級趕，12點鐘起程出發去機場，我一樣行李都無拎就走左。

到終於冷靜少少，係飛機嘅時候，
我一直都喺度諗：「成個星加坡咁大，又冇佢酒店地址，就算問到佢喺邊一區，
過到去嘅時候佢都走左啦，咁點搵佢呢，韓劇嘅電視情節係現實裏面，真係唔會發生。」

到底我點先會搵到Eriko? 會唔會我去左星加坡都搵唔到佢? 好多問題出現左係我腦海。

最後，我用左一程機既時間，我已經諗到可以點樣搵到Eriko。

第一步，我就send左一張食飯相俾佢睇，
比佢以為我仲係香港同緊朋友一齊食飯，
第二步，再問佢係邊度做緊啲咩，等佢放下戒心。

如同我所料，佢share 左佢個位置比我，佢係Bradwell Hill，
Check 一下Google Map 發覺嗰度超級偏遠，
咁我就假定Eriko唔係住喺嗰度，一定係沿途經過果個地方，準備去附近既景點。

但附近既景點都唔少，到底Eriko會去邊到呢?

佢無答到我佢去緊邊，我再補多句：「你係咪send 錯location呀？周圍乜都冇嘅」
呢個時候，Eriko再whatsapp我: 「我去緊睇動物呀! 」

跟住我仲懶係輕鬆咁confirm 佢係自己一個：「自己一個去睇？傻架你？」

我就即刻跑去機場的士站，上到的士嘅時候係七點半。

由落機問Eriko係邊到，推測佢location，到上的士，前後不過半小時。

如果我嘅推測係無錯，Eriko真係去夜間野生動物園，但動物園咁大，
閒閒地都有幾千人，好似要係迪士尼入邊搵一個人，到底要點先一定會搵到佢?

諗一諗，我即刻上返官網，睇返巴士、地鐵路線圖，
佢要去果度有三個方法。
機會率：10％搭巴士，無巴士去到一個咁偏遠嘅地方
機會率：35％搭的士，除非佢住果度，如果唔係唔可能搭的士去（但唔可能住得咁偏遠）。
機會率：55％搭地鐵，係地鐵入面share 出黎嘅location 會唔準，但亦都近轉乘巴士嘅地方。

再諗多一層，Eriko 7 點15分係 Bradwell Hill，如果佢真係坐地鐵既話，即係仲有2個站就會去到Ang Mo Kio Station，
理論上要再轉 138號巴士入去動物園。

腦入邊即刻出咗Eriko個 Timeline：
7:15 係 Bradwell Hill
7:30 到 Ang Mo Kio
7:40 上巴士
8:10 到 Singapore Zoo

由於我坐的士嘅關係，一定會快過佢，
係8:00pm嘅時候我已經去到!
按以上既計算，佢應該未到，
我就第一時間係咁多巴士站入面去搵返個 138 巴士站。

去到巴士站，話咁快見到有架138巴士準備埋站，
個心即刻跳得勁快，
因為好快就會比到個surpirse 佢！
但亦有擔心可能佢根本唔係巴士上面……

眼見D乘客陸陸續續落車，
都仲係唔見Eriko，
雖然有少少灰心，但我安慰自己可能我黎得太早，又諗緊好唔好WhatsApp 佢，
不過我心諗：「唔緊要既，王嘉裕，下一班就會見到Eriko! 」

十分鐘後又有另一架巴士，答案係:
佢都依然唔係巴士度!

但我無理由會估錯。

俾你會唔會等多一班?

我又同自己講，等多一班，最後呢一班!

好，十分鐘後，又一班138巴士黎啦……
最後機會！

終於，
見到Eriko由巴士度行緊落黎，我好開心。

但望真d，竟然見到Eriko隔離有一個男仔!
之前仲夠膽問我係咪自己一個睇唔得。
原來一切，都係假嘅，話咩好趕、冇時間、冇心機去、覺得我好花心、唔信我，都係假嘅。