challengeiii_LOVESTOR_P3 a

一個90後創業家的愛情故事
你願意為一個女仔去到幾盡?

上回:終於,見到Eriko由巴士度行緊落黎
開心左一剎那,再望多一眼,竟然見到Eriko隔離有一個男仔!

到底我最後係走左過去搵Eriko對質定即刻調頭走?

(2)第二回
(1)第一回

-----------------
咁遠嚟到唔通就係咁?
我內心都掙扎左好耐,究竟過去定唔過去?

但你知我份人係唔知道個真相唔會心息,
跟住我行埋去淡淡然講左一句:「你唔係WhatsApp話自己一個去架咩?
你話唔信我,話我花心,原來你先係花心嗰個,你地玩得開心d!」
講完我無等佢回應,仲即刻擰轉頭就走。

佢拉住我同我講:「唔係你咁樣諗架,你咁樣我都好難做,
不如今晚晏啲我嚟搵你啦,再打俾你啦。」
我答:「得啦,明架啦,唔使解釋。」
我心諗我仲難做,你唔係打算今晚同埋呢個男仔嚟搵我呀?

之後我坐咗係的士站度,一個人係度灰,
喺度諗自己真係「太傻太天真」,
有d肚餓,諗住走之前,食少少野先啦,
跟住先買回程機票返香港都未遲啦,
一坐低,我電話就響,竟然係佢打黎!

我係到諗就睇下你仲有啲咩好講,
佢話:「裡面超多人排緊隊啊,我都係諗住唔入去啦,你依家係邊?不如一齊食啲嘢啦。」

係呢個時候我已經見到佢企左係我餐廳外面,
我個人真係好心軟,同埋本身我都幾鍾意逆向思維,
如果佢地真係有咩關係,Eriko 應該唔會痴線到叫我地一齊食嘢掛。

坐低左之後,個男仔就話幫佢買嘢食,仲叫我哋先傾吓計啦。
我心諗「洗你叫?」,然後再用親切嘅笑容對住佢假笑左一下。

大致上佢都係交代下佢地純粹係朋友,
同埋從佢嘅表情都睇得出 佢係好開心我真係黎左搵佢,
但我都不失霸氣咁講左幾句晦氣說話,哈哈!

究竟我應該同佢哋兩個一齊去玩,定係走呢?
我當時係咁諗嘅,習慣睇結果嘅我,知道如果我走咗,就一切都完。
所以我決定忍一時之氣,為走更遠的路……

之後就變咗一個三人行嘅活動,一齊行街、陪我去買衫(因為我一件衫都無帶),
而我當然有後著,我Book間酒店係正個女仔隔離,
名正言順走嘅時候就可以送個Eriko返去喇。

去到11點幾,就已經淨返我同佢兩個,終於奸計得逞!
陪我去左酒店附近 24 小時營業嘅超級市場買返d日用品,
沿途都好開心咁大家講吓笑,打打鬧鬧。

我知佢鍾意睇波,專登問佢:「係喎,今晚歐聯決賽,不如一齊睇啦」,
佢好爽快咁話「好呀」。
但佢要返酒店沖埋涼、換埋衫,先過嚟我個邊睇波,
我心諗,仲唔搞掂?哈哈哈哈哈!(大家唔好亂諗嘢)

佢沖得涼嚟都已經踢到下半場,正當我去到佢酒店lobby 諗住打比佢之際,
佢就打比我: 「對唔住呀,我真係好眼瞓啦,下次先一齊睇波啦。」

真係嬲左,原先諗住咁都算啦,佢話聽日又玩“三人行”,
同我講話聽日約咗個男仔去環球影城玩,
如果你有興趣嘅話,一齊去玩都得架喎。
我直接收左佢線。

佢又打返比我,跟住我哋越傾越興,傾到鬧晒交,
鬧左足足45 分鐘,場波都踢完喇,佢都唔再眼訓喇,

去到最後我真係忍唔住鬧佢:
「你同我講要顧果個男仔感受,事先約咗佢唔好意思推,咁我呢?」

我繼續講:「得架喇,你唔洗揀架喇,你都唔洗推個男仔喇,
因為你唔會再有機會搵到我。我地當從來都無識過,當我無嚟過星加坡搵你!
你只需要『記住』今晚係你親手放棄我,一個真心對你嘅人。
你而家同我講你會『記住』,你講聲就得架喇!
亦希望你以後會搵到一個會山長水遠就係為左見你一面嘅人……」

我d對白都未講完,點知就比佢收左線……
打俾佢,又唔聽我電話。

跟住我WhatsApp佢:「Okay, noted」
佢咩都唔回應,我心入面都有個答案。

點知,佢WhatsApp 返黎話:「Your words do hurt me…」,
之後一個鐘後再send多句「Sorry for everything, goodnight」。

而我再冇回佢,
我覺得如果你聽日咁想同果男仔去,
我哋之間亦冇乜好講。

返到去,點都要睇埋歐聯決賽十二碼,
就算見到我好鍾意嘅C朗,好似呢個世界中心嘅男主角,
型到爆咁射入最後一球十二碼,
嬴埋歐聯,都完全無感覺。

諗緊聽日自己一個去邊度,仲話唔定可以寫一篇:「一個人去旅行散心嘅感覺」,
算啦,就算輸,我都算盡咗力啦。
返左香港先再算。

如果你係我,你聽日會一起身就走,定係都會默默咁等Eriko 再聯絡自己?
(待續)

LIKE= 一起身即走
喊樣 = 默默等佢聯絡自己
其他選擇,可以留言話我知

(快啲去FB留低你嘅response喇。)

Felix Wong 王嘉裕
Written by Felix Wong 王嘉裕
90後創業家、作家、文匯報專欄作家、英國 Warwick 法律系學士、香港大學犯罪學碩士 、RED EARTH 集團創辦人,公司旗下超過 20 個成功項目。