電影 Me Before You ：
一個好評如潮，小三嘅故事

嚴重劇透，未睇戲嘅千祈唔好讀落去。

呢套戲係講一個英俊嘅年輕人因為交通意外而下半身癱瘓，機緣巧合遇到一個漂亮可愛嘅女護士，日久生情下愛上左大家嘅浪漫愛情故事。

然後當然好評如潮啦 (評語 Copy from HKMovie)：
– 近期佳作推介！故事好有意義，有淚亦有笑。
– 太好看了，男女主角用不同演繹方法去表達愛。成套戲超多搞笑位，唔會得個喊，感動位又有。不過我覺得男主角都係要死好慘，有啲失望，以為會絕境求生。

當我睇緊呢套戲嘅時候，其實都覺得好感動睇到眼濕濕，亦覺得好好笑，整體來講都算係一套好好睇嘅片。

但當我諗深一層嘅時候……先發覺其實呢套片好似有啲唔合邏輯， 然後嘗試解構返呢個故事：

其實呢套戲係關於女主角同男朋友拍咗七年拖，轉換工作環境後遇到一個好有錢嘅男人。呢個男人可以負擔得起俾女主角去explore一個佢從來未體驗到嘅世界，跟住佢就見異思遷，完全唔理男朋友感受，同呢個有錢男人環遊世界。

個問題就嚟啦，點解一套關於出軌嘅愛情故事，經過細心計算嘅包裝之後，就會Flip 到我哋嘅思想諗法，甚至得到我哋同情，令到我哋大部份人覺得以上嘅行為係 Okay？

再諗一諗，呢套戲入面嘅情節同之前負評如潮嘅 洗先生 & M小姐 、周先生   同 R小姐故事，係道德倫理上其實唔大分別？ 套戲都仲叫做好啲，你可能了解到上文下理，但係真人真事嘅情況，我哋又知幾多呢？未知晒就負評如潮？

反思後想帶出嘅訊息就係：我哋大部份人諗嘅嘢，並唔係自己可以控制去點諗一件事，好多時候我哋係被社會/所謂嘅道德觀念操控去點樣諗一件事。

將呢個話題再推深一層去諗，同性戀係以前的社會係唔應該被允許，全個社會嘅人都覺得同性戀係有病，覺得要殺左佢哋。真人真事電影《模仿遊戲》(The Imitation Game) 入邊嘅救世英雄 Alan Turing 幫手完結左二次世界大戰，但都因為係同性戀而被監禁、最後被迫死。

去到我地呢個年代，社會同我地講同性戀應該被接受，我哋嗰個就覺得同性戀係冇問題，甚至覺得「認為同性戀係有問題」嘅人係有問題。

其實真正個問題係邊呢？

我個人覺得同性戀係冇問題，但係如果諗一諗：我哋係咪真係有用個腦、帶着一個具批判性嘅思想，去諗嘢？定係人云亦云，盲目遵從其他人嘅思想。

Are you sure what you think is really what you think, or is it just thoughts that others insert upon you?

自己諗一諗。